ठामपाने कोरोना रुग्णालयासाठी "आपला दवाखाना"चा निधी द्यावा - भाजप
ठाणे :
आम्ही राजकारण करीत नसून आधी कम्युनिटी किचन आणि आरोग्य साहित्य खरेदीत जो काही घोटाळा झाला आहे, तो आधी महापौर म्हणून आपण उघड करावा असे आव्हान भाजपचे गटनेते संजय वाघुले यांनी महापौरांना दिले आहे. तसेच या कोरोना रुग्णालयासाठी "आपला दवाखाना"चा निधी द्यावा अशी मागणीही त्यांनी पुन्हा केली आहे. कोरोना रुग्णालयासाठी नगरसेवक निधी वापरण्याऐवजी आपला दवाखानाचा निधी वापरावा असे मत भाजपच्या नगरसेवकांनी व्यक्त केले आहे.
कोरोना रुग्णांसाठी महापालिकेच्या माध्यमातून ग्लोबल इम्पॅक्ट हब येथे रुग्णालय उभारण्याचा निर्णय घेण्यात आला आहे. परंतु । आता यावर राजकारण चांगलेच तापले आहे. भाजपने विरोध केल्यानंतर महापौरांनी भाजपला राजकारण न करण्याची विनंती केली होती. परंतु आता भाजपने शिवसेनेवर पलटवार करीत रुग्णालयासाठी नगरसेवक निधी का द्यावा असा सवाल केला आहे. महापौर नरेश म्हस्के यांनी भाजपला शालजोडीतले लगावत हा विरोध केवळ राजकीय असल्याचा आरोप केला आहे.
आता महापौरांनी केलेल्या प्रत्येक आरोपांचे खंडन भाजपने केले आहे. नगरसेवक निधी ऐवजी रुग्णालयासाठी आपला दवाखानाचा निधी पडून आहे, तो देण्यात यावा, अशी मागणी भाजपने लावून धरली आहे. हा निधी देऊ नये म्हणून तुमचे हात दगडाखाली अडकले आहेत का?, कोणाला कमिटमेंट केली आहे का? असे अनेक सवाल वाघुले यांनी आता उपस्थित केले आहे.
