कंटेनमेंट झोनमधील वकीलांना न्यायालयात येण्यास परवानगी नाही
ठाणे :
ठाणे जिल्हा न्यायालयाचे कामकाज हे ८ जून पासून सकाळी १०.३० ते दुपारी १.३० आणि दुपारी २.३० ते सायंकाळी ५.३० अशा दोन सत्रांमध्ये सुरु झाले आहे. असे असले तरी कंटेनमेंट झोनमधील वकीलांना न्यायालयात येण्यास परवानगी नाही. कामकाज नेहमीप्रमाणे सुरु असले तरी कोरोनाच्या पार्श्वभूमीवर संपूर्ण कामकाज सुरु ठेवण्याला एकीकडे वकील संघटनांचा विरोध आहे.
पूर्वीप्रमाणेच केवळ तातडीची आणि गंभीर स्वरुपाच्या प्रकरणांची सुनावणी एका सत्रामध्ये केली जावी, अशी मागणी वकील संघटनांनी प्रधान न्यायाधीशांकडे केली होती. यासह वकीलांना बसण्यासाठी बार रुम खुला करण्यात यावा, अशा काही प्रमुख मागण्या वकीलांनी केल्या होत्या. मात्र, दोन सत्रांमध्ये हे कामकाज सुरु करण्यात आले असून यापुढे सर्व प्रकारचे स्थगिती आदेश हे पुढील तारखेपर्यंत कायम करण्याचे (वाढविण्याचे आदेश जिल्हा प्रधान न्यायाधीश जोशी यांनी मंगळवारी दिले. दरम्यान, सोमवारपासून जरी न्यायालयाचे कामकाज हे नियमित सुरु झाले असले तरी ८ आणि ९ जून रोजी न्यायालयात अवघ्या १०० ते १५० वकीलांची उपस्थिती होती. मात्र, वकीलांच्या अनुपस्थितीअभावी कोणत्याही प्रकरणांमध्ये एकतर्फी आदेश देण्यात आले नसल्याची माहिती सूत्रांनी दिली.
